భారత్ డిజిటల్ న్యూస్ విశాఖపట్నం..విద్యా ప్రమాణాల పెంపునకు మరింత కృషి చేయాలి
ఉత్తమ ఉపాధ్యాయ అవార్డు గ్రహీతలకు డీఈఓ యు.వి. సుబ్బారావు హితవు
విద్యార్థులను ఉన్నత పౌరులుగా తీర్చిదిద్దడమే ఉపాధ్యాయుల ప్రధాన బాధ్యత
మచిలీపట్నం ప్రతినిధి
విద్యా ప్రమాణాలను మరింతగా పెంపొందించేందుకు ఉపాధ్యాయులు అంకితభావంతో కృషి చేసి కృష్ణాజిల్లాను విద్యారంగంలో మంచి స్థానంలో నిలపాలని జిల్లా విద్యాశాఖాధికారి యు.వి. సుబ్బారావు అన్నారు. విద్యార్థుల్లో సృజనాత్మకత, ఆత్మవిశ్వాసం, సామాజిక బాధ్యతలను పెంపొందించేలా బోధనా విధానాలను మరింత మెరుగుపరచాలని సూచించారు.
సోమవారం డీఈఓ ఛాంబర్లో ఇటీవల రాష్ట్ర ప్రభుత్వ ఉత్తమ ఉపాధ్యాయ అవార్డులు అందుకున్న పురిటిగడ్డ జిల్లా పరిషత్ ఉన్నత పాఠశాల ప్లస్లో స్కూల్ అసిస్టెంట్ డాక్టర్ ఓలేటి ఉమా సరస్వతి, ఆకునూరు ప్రభుత్వ ఉన్నత పాఠశాల స్కూల్ అసిస్టెంట్ రాజ్యలక్ష్మి మర్యాదపూర్వకంగా డీఈఓను కలిశారు. ఈ సందర్భంగా వారిని అభినందించిన డీఈఓ మాట్లాడుతూ అవార్డు లభించడం గర్వకారణమే కాకుండా బాధ్యతను మరింత పెంచుతుందని అన్నారు.
“మీ ప్రతిభకు లభించిన ఈ గుర్తింపు ఇతర ఉపాధ్యాయులకు కూడా స్ఫూర్తిగా నిలవాలి. విద్యార్థులలోని అంతర్గత ప్రతిభను గుర్తించి, వారిని ప్రోత్సహిస్తూ భవిష్యత్తుకు బలమైన పునాది వేయాలి. భావి భారత పౌరులను తీర్చిదిద్దే గొప్ప బాధ్యత ఉపాధ్యాయుల భుజస్కంధాలపై ఉంది. ఈ స్ఫూర్తితో మరింత ఉత్తమ సేవలందించి భవిష్యత్తులో మరిన్ని ఉన్నత పురస్కారాలను అందుకోవాలని ఆకాంక్షిస్తున్నాను,” అని యు.వి. సుబ్బారావు అన్నారు.
ప్రభుత్వం త్వరలో విద్యావిధానంలో నూతన సంస్కరణలకు శ్రీకారం చుట్టనున్న నేపథ్యంలో బోధనా పద్ధతుల్లో ఆధునిక మార్పులను ఉపాధ్యాయులు అందిపుచ్చుకోవాలని సూచించారు. సింగపూర్, ఫిన్లాండ్ వంటి దేశాలకు ఉపాధ్యాయులను పంపించి అక్కడి విద్యా విధానాలు, బోధనా పద్ధతులను పరిశీలించే అవకాశం కల్పించనున్నట్లు తెలిపారు. ఆయా దేశాల్లో అమలవుతున్న ఉత్తమ విద్యా విధానాలను సమగ్రంగా అధ్యయనం చేసి, వాటిలో మన రాష్ట్ర పరిస్థితులకు అనుగుణమైన అంశాలను పాఠశాలల్లో సమర్థంగా అమలు చేసే దిశగా ఆలోచించాలని అన్నారు.
విద్యార్థుల అభ్యసన సామర్థ్యాలను నిరంతరం అంచనా వేస్తూ, వెనుకబడిన విద్యార్థులపై ప్రత్యేక శ్రద్ధ చూపాలని డీఈఓ సూచించారు. తరగతి గదిని కేవలం పాఠ్యాంశాల బోధనకే పరిమితం చేయకుండా, విలువలు, క్రమశిక్షణ, మానవతా దృక్పథం పెంపొందించే వేదికగా తీర్చిదిద్దాలని అన్నారు. ప్రతి విద్యార్థిలో దాగి ఉన్న ప్రతిభను వెలికితీసి, వారి లక్ష్యసాధనకు ఉపాధ్యాయులు మార్గదర్శకులుగా నిలవాలని పిలుపునిచ్చారు.
పాఠశాలల్లో సాంకేతిక పరిజ్ఞానాన్ని సద్వినియోగం చేసుకుంటూ బోధనను మరింత ఆసక్తికరంగా, సులభంగా మార్చాలని తెలిపారు. తల్లిదండ్రులతో సమన్వయం పెంచుకుని విద్యార్థుల విద్యాభివృద్ధిపై నిరంతరం దృష్టి సారించాలని సూచించారు. ఉత్తమ ఉపాధ్యాయులుగా పొందిన గుర్తింపును జిల్లాలోని ఇతర ఉపాధ్యాయులకు స్ఫూర్తిగా మార్చి, ప్రతి పాఠశాలలో విద్యా వికాసానికి నూతన ఒరవడిని సృష్టించాలని డీఈఓ ఆకాంక్షించారు.
ఉత్తమ ఉపాధ్యాయ అవార్డు గ్రహీతలు డీఈఓ సూచనలను స్ఫూర్తిగా తీసుకుని విద్యార్థుల సమగ్ర వికాసానికి మరింత అంకితభావంతో పనిచేస్తామని తెలిపారు. విద్యారంగంలో కృష్ణాజిల్లాను ముందంజలో నిలిపేందుకు సమష్టి కృషి చేస్తామని పేర్కొన్నారు.