భారత్ డిజిటల్ న్యూస్ విశాఖపట్నం……సిరి సహస్ర నామినేషన్‌పై వివాదం..!
బీసీ సర్టిఫికెట్‌పై వైసీపీ అభ్యంతరం.. న్యాయస్థానాన్ని ఆశ్రయిస్తామని వెల్లడి..
విజయనగరం:
కొత్తవలస, తెర్లాం జెడ్పీటీసీ స్థానాలకు టీడీపీ అభ్యర్థిగా నామినేషన్‌ దాఖలు చేసిన సిరి సహస్ర అలియాస్‌ ముస్కాన్‌ జైన్‌ కుల ధ్రువీకరణ పత్రం వ్యవహారం వివాదాస్పదంగా మారింది. ఆమె సమర్పించినట్లు చెబుతున్న బీసీ కుల ధ్రువీకరణ పత్రంపై వైసీపీ అభ్యంతరం వ్యక్తం చేసింది.
సిరి సహస్ర అసలు పేరు ముస్కాన్‌ జైన్‌ అని, ఆమె తండ్రి పేరు రమేష్‌ జైన్‌ అని పేర్కొంటూ, ఓసీ వర్గానికి చెందిన వ్యక్తికి బీసీ సర్టిఫికెట్‌ ఎలా జారీ చేస్తారని వైసీపీ నేతలు ప్రశ్నిస్తున్నారు. బీసీ రిజర్వేషన్‌ స్థానంలో ఆమె నామినేషన్‌ను ఎలా కొనసాగిస్తారని అభ్యంతరం వ్యక్తం చేశారు.
కోర్టు ఆదేశాలకు విరుద్ధంగా తహసీల్దార్‌ బీసీ సర్టిఫికెట్‌ ఎలా జారీ చేస్తారని, అభ్యంతరాలు వ్యక్తమైన తర్వాత కూడా ఎన్నికల అధికారులు నామినేషన్‌ను ఎలా స్వీకరించారని వైసీపీ నేతలు ప్రశ్నించారు.
ఈ వ్యవహారంపై న్యాయస్థానాన్ని ఆశ్రయించి ఆమె నామినేషన్‌ను తిరస్కరించాలని కోరనున్నట్లు విజయనగరం జిల్లా వైసీపీ అధ్యక్షుడు బెల్లాన చంద్రశేఖర్‌ వెల్లడించినట్లు సమాచారం.
అయితే, కుల ధ్రువీకరణ పత్రం చెల్లుబాటు, నామినేషన్‌పై తుది నిర్ణయం సంబంధిత అధికారుల పరిశీలన, న్యాయస్థానం ఆదేశాలపై ఆధారపడి ఉంటుంది.
