భారత్ డిజిటల్ న్యూస్ గుంటూరు…..రూ.5.10 లక్షలకే సొంత ఇల్లు, పేద, మధ్య తరగతి వాసుల కోసం కొత్త టెక్నాలజీ, తొలిసారిగా ఏపీలోనే శ్రీకారం
సొంతతిల్లు అనేది ప్రతి ఒక్కరి కల. కానీ ఆకాశాన్నంటుతున్న నిర్మాణ ఖర్చులతో పేద, మధ్య తరగతి వారికి అది అందని ద్రాక్షలానే ఉండిపోతుంది. ఇల్లు కట్టడం అంటే గగనంగా మారిపోయిన ప్రస్తుత పరిస్థితుల్లో ఒక శుభవార్త వచ్చింది.
భవన నిర్మాణ రంగంలో విప్లవాత్మక మార్పులు తీసుకొస్తూ.. ‘త్రీడీ (3D) కాంక్రీట్ ప్రింటింగ్’ టెక్నాలజీతో ఇళ్లు నిర్మించే సరికొత్త ప్రాజెక్టుకు మన ఆంధ్రప్రదేశ్ నుంచే అంకురార్పణ జరగబోతుంది. దీంతో అతి తక్కువ ధరతోనే ఇళ్లు నిర్మించుకునే అవకాశం లభిస్తుంది.
రూ.5.10 లక్షలతో సకల సదుపాయాలు..
ప్రధానమంత్రి ఆవాస్‌ యోజన-గ్రామీణ్‌ 2.0 పథకంలో భాగంగా ఇల్లు నిర్మాణ అంశంలో తొలిసారిగా 3D టెక్నాలజీని తెరపైకి తెస్తున్నారు. సాధారణంగా ఈ పథకం కింద నిర్మించే మామూలు ఇళ్లకు కేంద్ర, రాష్ట్ర ప్రభుత్వాలు కలపి రూ.2.39 లక్షలు అందిస్తున్నాయి. అయితే, 3డీ టెక్నాలజీని ప్రోత్సహించే ఉద్దేశంతో ఈ నమూనా ఇళ్లకు ప్రభుత్వాలు అదనపు సాయం అందించనున్నాయి. ఒక్కో 3డీ ఇంటి నిర్మాణ వ్యయాన్ని అధికారులు రూ.5.10 లక్షలుగా ఖరారు చేశారు. ఈ బడ్జెట్‌లోనే ఇంటి నిర్మాణం, మెట్లు, ర్యాంప్, వాష్‌రూమ్ వంటి సకల సదుపాలయు కల్పించడం జరుగుతుంది.
బుర్రిపాలెంలో పైలట్ ప్రాజెక్ట్.. 100 ఇళ్ల నిర్మాణం
ఈ ప్రాజెక్ట్ ఆంధ్రప్రదేశ్‌కు దక్కడం వెనుక కేంద్ర గ్రామీణాభివృద్ధి, కమ్యూనికేషన్ల శాఖ సహాయ మంత్రి పెమ్మసాని చంద్రశేఖర్ కృషి ఉంది. తెనాలి నియోజకవర్గంలోని ‘బుర్రిపాలెం’లో పైలట్ ప్రాజెక్టుగా ప్రారంభించాలని ఆయన నిర్ణయం తీసుకున్నారు. దీనికి అక్టోబర్ 4న కేంద్ర, రాష్ట్ర ప్రభుత్వాలు సీబీఆర్‌ఐ మధ్య కీలక అవగాహన ఒప్పందం కుదరనుంది. మొదటి దశలో భాగంగా బుర్రిపాలెంలో 100 త్రీడీ ఇళ్లను నిర్మించనున్నారు. వీటితో పాటు గుంటూరు రూరల్ పరిధిలోని ఓబుల్‌నాయుడుపాలెంలో దివ్యాంగుల కోసం ప్రత్యేకంగా డిజైన్ చేసిన మరో 77 ఇళ్లను నిర్మించి వారికి ఇవ్వనున్నారు. ఈ పైలట్ ప్రాజెక్టు కోసం కేంద్ర ప్రభుత్వం రూ.9.44 కోట్లు, రాష్ట్ర ప్రభుత్వం రూ.4.49 కోట్లు భరించనున్నట్టు తెలుస్తుంది. తక్కువ ఖర్చు, వేగవంతమైన నిర్మాణం, పటిష్టతకు మారుపేరుగా నిలిచే ఈ 3డీ ఇళ్ల నిర్మాణం సక్సెస్ అయితే.. ఏపీ వేదికగా దేశవ్యాప్తంగా పేదల గృహనిర్మాణ రంగంలో పెను మార్పులు ఖాయం.
3D ఇళ్ల నిర్మాణానికి ఎందుకు ఖర్చు తగ్గుతుంది?
జనరల్‌గా ఇళ్ల నిర్మాణానికి కూలీలు, మేస్త్రీలతో నెలల తరబడి పని చేయాల్సి ఉంటుంది. కానీ 3డీ ప్రింటింగ్ టెక్నాలజీలో ఒక భారీ రోబోటిక్ ఆర్మ్ ద్వారా కాంక్రీట్‌ను లేయర్లుగా వేస్తూ గోడలు నిర్మిస్తారు. దీనికి కేవలం ఇద్దరు ముగ్గురు టెక్నీషియన్లు ఉంటే సరిపోతుంది. దీనివల్ల ఖర్చు 60 నుంచి 80 శాతం వరకు ఆదా అవుతుంది. సాఫ్ట్‌వేర్ ద్వారా డిజైన్ ముందే ప్రోగ్రామ్ చేయడం వల్ల ముడిసరుకు ఏ మాత్రం వృథా కాదు. ఈ ఇళ్ల నిర్మాణానికి కాంక్రీట్ వేసిన వెంటనే గట్టిపడే ప్రత్యేక మిశ్రమాన్ని వాడుతారు. దాని వల్ల ఖర్చుతో కూడిన సెంట్రింగ్, సామాగ్రి అవసరం ఉండదు. ముడిసరుకు, సమయం, కూలీల ఖర్చులు భారీగా ఆదా అవ్వడం వల్ల కేవలం రూ.5.10 లక్షలకే ఇల్లు నిర్మితమైపోతుంది. సాధారణంగా ఇళ్లు నిర్మించడానికి కొన్ని నెలల సమయం పడుతుంది.. కానీ ఈ టెక్నాలజీలో ఇళ్ల నిర్మాణం చాలా తక్కువ సమయంలోనే పూర్తైపోతాయి.
