భారత్ డిజిటల్ న్యూస్ హైదరాబాద్..సైనిక్‌పురిలో ఈ-సిగరెట్ల దందా గుట్టురట్టు….10 కోట్లకు పైగా లావాదేవీలు
సైనిక్‌పురిలోని ‘ది స్మోక్ షాప్’పై EAGLE ఫోర్స్, కుషాయిగూడ పోలీసులు సంయుక్తంగా దాడి చేశారు. 39 ఈ-సిగరెట్లను స్వాధీనం చేసుకుని, షాప్ యజమాని ఉబైస్ (20), ఉద్యోగి ఉస్సైనార్ పీహెచ్ (19)ను అదుపులోకి తీసుకున్నారు. మైనర్లకు కూడా నిషేధిత ఈ-సిగరెట్లు విక్రయిస్తున్నారనే ఆరోపణలపై దర్యాప్తు చేపట్టారు.
బెంగళూరులోని ఎంజీ రోడ్డులో పరిచయమైన అర్షద్ నుంచి ఉబైస్ ఈ-సిగరెట్లు కొనుగోలు చేసినట్లు అధికారులు అనుమానిస్తున్నారు. ఈ వ్యవహారంలో అర్షద్ పరారీలో ఉన్నట్లు సమాచారం.
వాట్సాప్ ద్వారా ఆర్డర్లు తీసుకుని, కేరళలోని కాసరగోడ్‌కు చెందిన కెనరా బ్యాంక్ ఖాతాకు అనుసంధానమైన ఫోన్‌పే ద్వారా చెల్లింపులు స్వీకరించినట్లు దర్యాప్తులో వెల్లడైంది. ఆగస్టు 3, 2026 నుంచి రాపిడో ద్వారా 26 డెలివరీలు జరిగినట్లు గుర్తించారు. హైదరాబాద్‌లో సుమారు 45 మంది వినియోగదారులను గుర్తించారు.
కేరళలోని కాసరగోడ్, కర్ణాటకలోని దక్షిణ కన్నడ ప్రాంతాలకు సంబంధించి రూ.10 కోట్లకు పైగా లావాదేవీలపై అధికారులు దర్యాప్తు చేస్తున్నారు. గత రెండు నెలల్లో నిషేధిత ఈ-సిగరెట్ల విక్రయాలపై ఏడు ఔట్‌లెట్లలో తనిఖీలు చేపట్టినట్లు EAGLE ఫోర్స్ వెల్లడించింది.
ఈ-సిగరెట్లలోని నికోటిన్ పిల్లలు, యువత మెదడు అభివృద్ధిపై ప్రభావం చూపడంతో పాటు వ్యసనానికి దారితీయవచ్చని అధికారులు హెచ్చరించారు. పిల్లలపై తల్లిదండ్రులు, పాఠశాలలు నిఘా ఉంచాలని సూచించారు. ఈ కేసులో భారతీయ న్యాయ సంహిత, 2019 ఎలక్ట్రానిక్ సిగరెట్ల నిషేధ చట్టం, పొగాకు ఉత్పత్తుల చట్టం కింద కేసు నమోదు చేసి దర్యాప్తు కొనసాగిస్తున్నారు.
